अल्माड़ बटी , बेड़नाग हूँ बाट लागि भयूँ , आदु किलो बाल मिठै झ्वाल में धरि बेर बस में बैठि गयूं । हिटण जाणे , कंडक्टर और ड्राइभर सैपैली अत्ति ढील करि दे , नै ध्वे बेर , ख्वार में टोपि लगै , कपाव में पिठया झमकै बेर , असीक टोपि में खोसि बेर पूजि गै कूंछा !! एक मैस जो ड्राईवर सैपन कणी जाँणनेर भयो , कूँण लागि ," किलै हो पाठकज्यू !! याइ एतुक ढील करि हाली , अब कब पुजूनेर भया तुम बेडिनाग ? ड्राइवर सैपलि कंडक्टर हूँ धात लगै ," सब बैठ गईं रे गोपिया ? मैं गाड़ि चलूँनु , फिर जन कये कि फलांण छुटि गौ !! खिसियै बेर कंडक्टर कूँण लागि ," हिटौ हिटौ हो ड्राइवर सैप ! सब बैठ गईं , अब जो छुटलो त धात लगै ल्योल " ।
अल्माड़ बटी बेड़नाग हूँ वाया कोसी, गरुड़, बैजनाथ, सोमेश्वर और बागसर जाण हुनेर भै , शेरघाटक बाट तब नि बणी भै । अल्माड़ बस स्टेशन बटी कोसि तक पन्द्र बखत गाड़ि रोकि बेर पैसेंजर बिठाई गै , जब अत्ति हैगे , तब फिर ज्योशज्यू बलाण ," अरे ! जाग जाग रोकि बेर तुम अधरात्तै पुजाला " । खैर, फिर ड्राइवर सैपनैलि खटाखट गाडि चलै कुँछा । गरुड़ पूजण है पैली एक गौं पड़ि , वांक मैस और सैंणी सड़काक किनार ठाड़ हई भै , उ आपण चेलि कनि विदा करुं हूँ आई भै , एक मैसेलि गाड़ि कनि हाथ दियो , गाड़ि रुकण बाद सब सैंणी टिटाट करण बैठि , एक एक करि बेर सब सैंणी ऊ चेलिक्ण अँगाल हाल्नेर भै कुंछा , एकाध त यस डाड हाल्नेर भै कि कस जस है गे । ऊ चेलिल लाल साडि पैरी भै मली बटी रंगवाई पिछौड़ खिती भै , वीक दुल्हौ जो उकणी विदा करूण हूँ आई भै वील पिंगलो कोट और तली बटी हरी पैंट पैरी भै , उ यो दुनियादारी है दूर ठाड़ बिडि फूंकण लागि भै । ततजानै कंडक्टर सैप झीकान हैगे , उ जोरैली कूँण लागि ," किले हो पधान ज्यू है गो त सैँणिनक डाड - डुक्क !! हिटनु पै अब ? " पधान ज्यू कूँण लागि ," जागो हो कंडक्टर सैप , येकि बुब उणै , वील भेट नि करि राखि " । तालै चाऔ त , मल गाड बटी वीक बुब डाड मारने ऐगे अँगाल हालि बेर कूँण लागि ," भली कै जाए चेली आपुंण सौरास ! जेठक घाम नि लागौ तेकणी , चौमासक द्यो नि भिजऔ , पूसक घाम तापिये , तेरि बाखइ धन धानेलि भरी रौ , गोर -बाछ , धिनालि बणी रौ , बचि रूण चैनेर भै भुली , शिबौ ! कतुक झटकि गै छै तु , सौरास में निसासी जाली त बाटुई लगाये , मैतक मान धरिये चेली , जा ! पै !! जा !!! "।
उ दुल्हौ - दुल्हैंनिक बैठणक बाद गाड़ि फिर हिट दे । गरुड़ पूजी बेर , ड्राइवर सैपनैलि , एक दुकानैक सामणि बस रोकि , दुकानदारैली ड्राइवर सैपान कनि एक चिठ्ठी दी बेर कौछ , यो चिठ्ठी बगसर म्यार दाज्यू कनि दी दिया हो " ड्राइवर जब गाड़ि अघिल कै लीजाण लॉग , त दुकानदार कूँण लग ," जागौ हो ड्राइवर सैप, चहा पी जाऔ ,गडबडान बड़े राखौ तुमर लिजी " और फिर ड्राइवर सैप चहा पिण बैठ गे । गरुड़ बस स्टेशन में फ़िर गाड़ि रुकि , यां कंडक्टर सैपेलि , एक बोरी बिड़िक बण्डल , लोवर क्लास में धरि दे , वीक बासैलि , सोमेश्वर पूजण है पैली , कतुकन उखाव हैगे । सोमेश्वर में तीन चार सवारि उतरि त पांच छै नई बैठ गे , कंडक्टरैली याँ गूड़ेकी भेलि धरै दीं , अब त जागै नि भै , जसि कसि असज मं बैठि बेर जाण पड़ि, के कई जाऔ अघण !!
बागसर पूजण जाणे ड्राइवर और कंडक्टर कनि भूख लागि गे , एक होटलक सामुणी गाड़ि रोकबेर द्वीनू खाण बैठि गे , अब सवारिनैलि ले रैत और पकौडि खाण शुरू करि दे , जतुक रैत और पकौडि बेचीनेर भै उतुकै इन लोगनक कमीशन हुनेर भै , खाण - पिण घातक भै । बागसर में उ दुल्हौ दुल्हैंणि उतरि गे , बाटभर दुल्हैंणिक , उखालनै - उखालनै बिडौल है गे , बिचारिल जतुक सिँगल पू खाई भै , सब भ्यार खिती गे । एक घंट बागसर रुकना बाद , गाड़ि अब धारै - धार जाण लागि , बाटभर सवारिनैकि बैठण उतरण लागि भै , कंडक्टर सेपैकि भल कमै हई भै । क्वारब पुजि बेर ड्राइवर कूँण लागि ," अब आदू घंटाक हाल्ट छ भाई , जनन कनि हल्क हुंण छ या चहा पिंण छ , जल्दी करौ , अब गाड़ि सिद्ध बेड़नाग रुकैलि , मस्त ढील है गे , संधिकाल छै बाजिया बाद गाड़ि चलूँण बंद है जांछ "अब ज्योषज्यू रिषाण लागि ,' होय !! होय !! ढील त हमैलि करी भै , तुम त जसि बिना रोकी गाड़ि खींचणौ छ " रत्ते सात बाजि अल्माड़ बटी ब्यालाक छै बाजि बेड़नाग पुजूंणौ छा , धन्य हो पाठक ज्यू !!
No comments:
Post a Comment